莊偉忠：智者不惑　無欲則剛

收到一封閙到我趴街嘅電郵，我行得正企得正，點會怕人閙，孔夫子話齋：三人行必有我師，如果閙得有水準，即係塞錢入我袋，多謝都嚟唔切。

可惜封電郵無乜內容，但唔覺意掂到啲做人做生意嘅原則問題，即管講吓我嘅睇法：

1. 任何情況下，都唔應該為咗滿足虛榮心，用公家錢堆砌個人曝光率同埋知名度，有麝自然香，用錢買，有乜咁馨香。

2. 絕對唔可以干涉傳媒編採方針，你有權唔接受訪問，但接受咗，就唔好言不由衷，做完訪問，人哋點寫，係人哋嘅自由，就算唔啱聽，都唔可以輸打贏要，好似細路咁，向傳媒上層投訴，影響記者飯碗，呢個係弱者行為。

3. 唔可以利用個人關係，或者威逼利誘，要求媒體寫鱔稿捧場。𠵱家資訊爆炸，官樣文章嘅鱔稿有鬼人睇咩，咁低B嘅嘢，我以前唔做，𠵱家唔做，將來唔做，亦都唔准同事咁做。

4. 拙作、專欄、面書專頁嘅文章，全部係自己用手機寫嘅，鍾意點寫就點寫，文責自負。過去半年，推咗四、五個寫專欄嘅請求，𠵱家每日公餘用大概兩粒鐘搵題材、寫稿同埋回覆網友，分享做人營商信念，㚒埋寫咗五六萬字，簡直係搵苦嚟辛，但係我鍾意呀。

5. 演講係副業中嘅副業，如果你識演講，可能對公司形象有啲幫助，有人邀請，啱心水，有時間，就做，過去半年推咗超過四十個邀請，使乜求人畀我講。

6. 無咗母公司，我哋發展會點？鬼知咩，可能差啲，又可能好啲，我以前有份打骰嘅安信，無大公司背景，一樣做得幾掂。過去幾年，我推咗太多街外人嘅開舖邀請，到𠵱家仲係覺得好後悔、好可惜。

如果話我哋一定唔掂，未免貶低咗我班同事嘅能力同埋努力，我哋開發嘅產品、服務、推廣方式、操作方法，去到邊都應該有生存能力，其他公司未必輕易贏到我哋。如果真係唔掂，執咗佢，唔好留低獻世。

7. 做人做生意，講風格，講膽量，突圍而出靠鮮明嘅personal branding，得閒讀吓市場學大師Philip Kolter嘅Marketing 3.0，瞭解吓乜嘢叫做Marketing by Values。我喺安信年代，已經用個人價值觀做推廣，經過十幾年磨練，直頭可以開班授徒，咁「簡單」嘅生意哲學，外行人好難明白。

8. 世界唔係樣樣黒白分明，唔可以淨係用意識形態判斷，越大聲，越青筋暴現，言辭手段越惡毒，越識語言偽術，除咗顯示自己理虧，水平低劣，對分析事件或者辨明是非，有鬼用咩。長期咁做，又點會進步？遲早畀人淘汰。

9. 李天命教落，你唔重視嘅人，一於當佢哋係人生旅途嘅魚蝦蟹，佢哋係咪紥紥跳、死心眼、唔肯面對自己嘅失敗，同你無關，阻唔到你快樂。我很快樂。

原本諗住做完九月尾最後一場公開演講，就鳴金收兵，𠵱家知道有人見到我嘅報導就作嘔，咁就要幫佢震盪治療吓，一於做多兩三場囉。

智者不惑，無欲則剛。提醒自己，提醒朋友，唔該些牙。

原文刊於莊偉忠facebook。